تورکی باغمیشه

نه یازیم نجور یازیم بیلمیرم. ءاوز دیلیمی باشارمیرام یازام. غریبه ایش دی. من تورکم. نیه تورکم بیلمیرم. اصلا تورکم کی نوغولسون. نیه بوردایام بیلمیرم. ننه م منی بوردا دوغوبدی. آدیم غضنفر دی. قیرخ نئچه یاشیم وار. عقلیمین نئچه یاشی وار بیلمیرم. بالا بالا بو تورکی یازماق خوشوما گلیر. اوره گیم آچیلیر یازدیقجا. نوغول کیمی آغزیمدا اوغولور. آی داد وئریر.

من تبریزلی ام. دده بابام تبریزلی دی. بورا باغمیشه دی. ایندی عباسی خیاوانی اولوب. خاطیره لریم بوردادی. ننه م اکرم گولدسته نین قیزی ایدی. گولدسته ده اسداللانین قیزی ایدی. اسداله دا گول مورادین اوغلی ایدی. گول موراد دا ایسکندرین اوغلی ایدی. ایسکندر آمما کیمین اوغلی ایدی هاردان گلمیشیدی تبریزه بیلمیرم.

ایسکندرین ائوی باغمیشه ده آراکوچه ده ایدی. سیاوانا یئتیشمهمیش اوست الده. ایسکندرین ایکی اوغلی واری ایدی: گول موراد، گول احمد. گول موراد اون بش یاش گول احمد ده ن بویوک ایدی. اوگئی چی لیق لاری واریدی. دده بیر ننه آیری دیله ر.

گول احمد قاپلارینا بیر یئکه ایت باغلامیشدی هئش کس یاخینا گئده نمه زدی. ایسکندرده ن سورا او حیطی ساتمیشدیلار. نئچه یه من بیلمیرم. گول موراد گلمیشدی کلانتر محله سینده ائو دوتموشدی. گول احمد ده شورچمن محله سینده ائو آلمیشدی. گول موراد باغا باخاردی. گول احمد ده مالا باخاردی. اینکچی ایدی. یئکه یئکه جامیش لاری واریدی. سوتله رین قئیماخ لارین یوغوتلارین پنیرلرین کره لرین ساتاردی. حیط لری نین وسطین ده بیر یئکه جولا واریدی مال لارین زیل لرین توکهر دیلهر. داملایندا آروادلار یاپبا یاپاردی. یاپبالاری تندیرده یاندیراردیلار چورک پیشیرهر دیلهر. همسایالار گه لردی تندیرده بیت بیره لرین سیلکهردی یاندیراردی.

گول احمدین آروادی نین آدی حلمه ایدی. ایلاتی دی. جوراب لارین چهکهردی دیزلرینه گئده ردی طوله ده جامیشلاری ساغاردی. اوچ اوغلی اوچ قیزی واریدی: قدمعلی، حمزه علی، سیفعلی، رودابه، سودابه، نارین گول. قدمعلی، حیدرعلی نین دده سی ایدی. حمزه علی ده گولدسته نین اری ایدی. حمزه علی موستراحا گئدنده من قاچاردیم تختین ده یاتاردیم زیور ساواشاردی. زیور حمزه علی نین سونکی آروادی ایدی. حمزه علی دستمالچی باغینا باخاردی. گوی گوز بیر کیشیدی. قلبی نوخوشودی. تختی ائوین گوشه سین ده ایدی. یورقان دوشک یئری نین یانین دا. بو یورقان دوشک یئری قدیم اوش دانا پیلله ایدی چیخاردی یئتیشه ردی بیر تنبی یه اوردان دا بیر دهلیزه. دهلیزین دالدان گول احمدین حیطینه قاپیسی واری ایدی. گولدسته بو دهلیزده اوشاقلارا قوران درسی وئره ردی.

سلطنت دئیه ر کی او زامان باغمیشه ده اوش دانا قیز مدرسه یه گئتمیشدی بیری ده گول دسته ایدی. آهو گولدسته نین بالا باجی سی دئیه ر کی گولدسته مدرسه یه گئده نده ابوالقاسم دوشموش دی دالیسیجان گولدسته حیالی دی آخشام ائوده دئمیشدی که من دای صاباحدان مدرسیه گئت میره م نه قدر اسداله سوروشموشدی نیه، دئمه میش دی. طرلان گولدسته نین یئکه قیزی دئیه ر کی گولدسته مدرسیه گئدنده الجک ایاخلیق گئیه ردی نامحرم گورمه سین. ننهم اکرم دئیه رکی گولدسته دوگی دملی ینده عطیری شورچمنین آغزیناجان گئده ردی شهناز گولدسته نین اورتا قیزی دئیه رکی گولدسته چوره کین آرا گولون وئره ردی من یئیه ردیم.